आम्हां घरी धन शब्दांचीच रत्नें ।
शब्दांचीच शस्त्रें यत्न करूं ॥
शब्दचि आमुच्या जीवाचें जीवन ।
शब्द वाटूं धन जनलोकां॥
तुका म्हणे पाहा शब्दचि हा देव ।
शब्देचि गौरव पूजा करूं ॥
26, 27 मे 2008 रोजी म.सा.प.ने आपला शतकोत्तर दुसरा वर्धापनदिन साजरा केला. आपणाला सांगायला फार आनंद होतो की दरवर्षी साजऱ्या होणाऱ्या स्मृतिदिन व पारितोषिक समारंभाव्यतिरिक्त अनेक नवीन उपक्रम म.सा.प.ने सुरू केले आहेत. त्याची सविस्तर माहिती आपणास व्हावी म्हणून हा लेखन प्रपंच.
मराठी भाषा आणि साहित्य यांची जपणूक, विकास व प्रसारासाठी ज्या संस्था सातत्याने कार्यरत आहेत, त्यापैकी सर्वात आद्य संस्था म्हणजे महाराष्ट्र साहित्य परिषद. त्या दृष्टीने म.सा.प.ही ज्येष्ठ आणि प्रातिनिधिक साहित्य संस्था आहे. 1906 साली पुणे येथे चौथ्या ग्रंथकार संमेलनात या संस्थेची स्थापना झाली. त्या पूर्वी साहित्य प्रसाराचे काम सार्वजनिक ग्रंथालयांमार्फत चालत असे. एकोणिसाव्या शतकाच्या दुसऱ्या दशकात आपल्या येथे इंग्रजी राजवट सुरु झाली आणि विविध ज्ञान शाखांची ओळख आपल्याला झाली.